some-ವೇದನೆ

ಮನದ ಕನ್ನಡಿಯಲ್ಲಿ ನಿನ್ನದೆ ಬಿಂಬ
ನೀನಿಟ್ಟ ರಂಗವಲ್ಲಿ ಅಂಗಳದ ತುಂಬಾ
ಒಡೆದ ಮನದಲ್ಲೂ ನಿನ್ನದೇ ನೂರು ಚಿತ್ತಾರ
ತೊರೆದುಹೋದ ಮನೆ, ಕದಡಿದ ಬಣ್ಣಗಳ ಸಾಗರ

ತಂತಿ ಹರಿದ ವೀಣೆಯಲ್ಲಿ ಸುಸ್ವರವು ಬರದು
ನೀನಿಲ್ಲದೆ ಇನ್ನೇನಿದೆ, ಹಾಳು ಬಾಳೇ ಬರುಡು
ನನ್ನ ನಾ ಮರೆತಂತೆ ನಿನ್ನ ಮರೆಯದಾದೆನು
ನಿನ್ನದೇ ನೆನಪಲ್ಲಿ ಖಾಯಂ ಬಂಧಿ ನಾನು

ನೀ ಹೋದ ದಾರಿಯನ್ನೇ ಎದುರು ನೋಡಿ ಕೂತಿರುವೆ
ಆಶಾವಾದಿ ಹಾಳು ಮನಸು
ನನ್ನೊಲುಮೆ ಅರಿವಾಗಿ ಹಿಂತಿರುಗಿ ನೋಡುವೆಯೋ
ಆಸೆಯಿಂದ ಕಂಗಳು ಕಂಡಿದೆ ಕನಸು

ವೇದನೆ

ಕಣ್ಣುಗಳು ಮಾತಾಡಿದೆ ಮೌನದ ಭಾಷೆ
ಹೃದಯದಲಿ ಉಳಿದುಹೋಗಿದೆ ನಿನ್ನದೇ ಆಸೆ
ಒಲವಿನ ಕಡಲಲ್ಲಿ ನೂರಾರು ಸವಿನೆನಪಿನ ಕಂತೆ
ಪ್ರೀತಿ ಮಾಯವಾಯಿತೆ ನೀರ ಮೇಲಿನ ಗುಳ್ಳೆಯಂತೆ
ವಿರಹದಲಿ ಹೋಳಾಗಿದೆ ಕನಸಿನ ನೌಕೆ
ನೀ ಜೊತೆಗಿರದ ಬಾಳ ಪಯಣವು ಬದುಕೇ??

ಮನದ ಕಡಲ ಅಪ್ಪಳಿಸುತಿವೆ
ನೆನಪಿನ ಅಲೆಗಳು ಸತತ
ಹೇಳತೀರದ ಸಿಹಿಯಾದ ವೇದನೆ
ಒಳಗೊಳಗೆ ಒಡಲ ಕೊರೆತ

ಕೇಳದೆ ಮನದನ್ನೆ ನಿನಗೆ
ಎನ್ನ ಮನದಾಳದ ತುಡಿತ
ಹುಚ್ಚು ಪ್ರೇಮಿಯ ಕೊನೆಯುಸಿರಲ್ಲೂ
ನಿನ್ನದೇ ಹೆಸರಿನ ಎದೆಬಡಿತ

ನುಡಿ ನಮನ

ಬೆಳಗಲಿ ಮನೆ-ಮನಗಳಲಿ
ಕನ್ನಡದ ಜ್ಯೋತಿ
ಹರಡಲಿ,ಸಾಗಲಿ
ಡಿಕ್ದಿಗಂತಗಳ ದಾಟಿ

ಸುರ ವಾಣಿ ಇದು
ಮನಕೆ ತಂಪು, ಕೇಳಲು ಇಂಪು
ನಭವೆಲ್ಲಾ ಆವರಿಸಲಿ
ಕನ್ನಡ ಕಸ್ತೂರಿಯ ಕಂಪು

ಅನ್ಯ ಭಾಷೆಗಳೂ ಇರಲಿ
ಸೋದರರ ರೀತಿ
ಕರುನಾಡ ಮೇಲೆ ಇರಲಿ
ಅಪರಿಮಿತ ಪ್ರೀತಿ

ಕನ್ನಡ ಹಬ್ಬದಂದು
ಮನದ ಆಸೆ ಈ ಕವನ
ಕರುನಾಡ ತಾಯಿಯ ಪಾದಕೆ
ಕಿರಿಯನ ಪುಟ್ಟ ನುಡಿ ನಮನ

ಕನ್ನಡ ಟಿ-ಶರ್ಟ್

ಕನ್ನಡ ಕವನಗಳ ಸಾಲು ಹೊತ್ತ ಟಿ-ಶರ್ಟ್ ಗಳನ್ನು ಬಹಳ ದಿನಗಳಿಂದ ಹುಡುಕುತಿದ್ದೆ. ಇಂದು ಅಂತಹ ಒಂದನ್ನು ಖರೀದಿಸಿದ್ದಾಯಿತು. ಹಾಗೆಯೇ ಒಂದು ಸಂಸ್ಥೆ ಮತ್ತು ಕೆಲವು ಸ್ನೇಹಿತರ ಪರಿಚಯವೂ ಆಯಿತು. ಸಮಾಜ ಸೇವಕರ ಸಮಿತಿ ಹೊರತಂದಿರುವ ಈ ಟಿ-ಶರ್ಟ್ ಗಳ ಹಿಂದೆ ಒಂದು ಒಳ್ಳೆಯ ಆಲೋಚನೆ, ಕ್ರಿಯೆ ಅಡಗಿದೆ. ಈ ಸಂಸ್ಥೆ ಬಳ್ಳಾರಿ ಜಿಲ್ಲೆಯಲ್ಲಿ ಗ್ರಾಮೀಣ, ಬಡ ಮಕ್ಕಳಿಗೆ ಎರಡು ಶಾಲೆಯನ್ನು ನಡೆಸುತ್ತಿದೆ. ಸದಸ್ಯರ ದೇಣಿಗೆ ಮತ್ತು ಕನ್ನಡ ಟಿ-ಶರ್ಟ್, ಅಂಚೆ ಕಾರ್ಡ್ ಗಳ ಮಾರಾಟದಿಂದ ಮಕ್ಕಳ ಜ್ಞಾನಾರ್ಜನೆಗೆ ಸಹಾಯ ಮಾಡುತ್ತಿದೆ. ಸಂಸ್ಥೆಯ ಬಗ್ಗೆ ಇನ್ನು ಹೆಚ್ಚಿನ ವಿಚಾರವನ್ನು ಮುಂದೆ ಬರೆಯುವೆ...

ಇಂದು ನಾ ಕೊಂಡು ಬಂದ ಟಿ-ಶರ್ಟ್ ಮತ್ತು ಕವಿ ಸಾಲುಗಳ ಅಂಚೆ-ಕಾರ್ಡ್ ::






ನಿಮಗೂ ಟಿ-ಶರ್ಟ್ ಬೇಕಾದಲ್ಲಿ ಈ ವಿಳಾಸವನ್ನು ಸಂಪರ್ಕಿಸಿ ::

ಸಮಾಜ ಸೇವಕರ ಸಮಿತಿ
ನಂ ೧೭೧ , ಸುಬ್ಬರಾಂ ಚೆಟ್ಟಿ ರೋಡ್
ನೆಟ್ಟಕಲ್ಲಪ್ಪ ಬಸ್ ಸ್ಟಾಪ್ ಹಿಂಭಾಗ
ಬಸವನಗುಡಿ
ಬೆಂಗಳೂರು ೪

ಇಮೇಲ್ :: sssamaja@gmail.com

ಅನಂತದಲ್ಲಿ ಲೀನವಾದ ರಾಜು

ಕನ್ನಡ ಸುಗಮ ಸಂಗೀತ ಕ್ಷೇತ್ರದಲ್ಲಿ ಚಿಕ್ಕ ವಯಸಿನಲ್ಲಿಯೇ ದೊಡ್ಡ ಹೆಸರು ಮಾಡಿದ್ದ ರಾಜು ಅನಂತಸ್ವಾಮಿ ಅವರು ತೀರಿಕೊಂಡಿದ್ದಾರೆ. ಪ್ರಖ್ಯಾತ ಸಂಗೀತ ಸಂಯೋಜನೆಕಾರ, ಗಾಯಕ ಮೈಸೂರು ಅನಂತಸ್ವಾಮಿ ಅವರ ಪುತ್ರರಾದ ರಾಜು ತಂದೆಯ ಹಾಗೆಯೇ ಗಾಯನ, ಗೀತ ಸಂಯೋಜನೆಯಲ್ಲಿ ಎತ್ತಿದ ಕೈ. ಕನ್ನಡ ಸುಗಮ ಸಂಗೀತ ಕ್ಷೇತ್ರದಲ್ಲಿ ಇವರಿಬ್ಬರ ಹೆಸರು ಅಜರಾಮರ. ಕವಿಗಳ ಪುಸ್ತಕಗಳಲ್ಲಿ ಅಡಗಿ ಕುಳಿತಿದ್ದ ಕವನಗಳನ್ನು ಕನ್ನಡಿಗರ ಮನೆ-ಮನಗಳಿಗೆ ತಲುಪಿಸಿದ ಶ್ರೇಯಸ್ಸು ಮುಖ್ಯವಾಗಿ ಇವರಿಗೆ ಸೇರಬೇಕು.

ರಾಜು ಅವರ ಹಾಡುಗಾರಿಕೆ ಅವರ ತಂದೆಯವರ ಹಾಡುಗಾರಿಕೆ ಬಹಳ ಹೋಲುತಿತ್ತು. ಹಾರ್ಮೋನಿಯಂ ಮೀಟುತ್ತಾ ರಾಜು ಹಾಡುತ್ತಿದ್ದರೆ ಕವನದ ಭಾವ-ಭಾವನೆ ಕೇಳುಗನ ಹೃದಯಕ್ಕೆ ನಾಟುವಂತಿತ್ತು. ಕವಿಯ ಗೀತೆಗೆ ಜೀವ ತುಂಬುವುದು ಇಂತ ಗಾಯಕರು ತಾನೆ... ರಾಜರತ್ನಂರವರ ರತ್ನನ ಪದಗಳು , ಟಿ.ಪಿ.ಕೈಲಾಸಂರವರ ಕವನಗಳನ್ನು ಅನಂತ-ದ್ವಯರ ದನಿಯಲ್ಲಿಯೇ ಕೇಳಬೇಕು.

"ಭೂಮಿನ್ ತಬಿದ್ ಮೋಡಿದ್ದಂಗೆ ...ಮಡಿಕೇರಿ ಮೇಲ್ ಮಂಜು", "ಕುರಿಗಳು ಸಾರ್ ಕುರಿಗಳು" , "ಯಂಡ ಯದ್ತಿ ಕನ್ನಡ ಪದಗಳ್" , "ಬದುಕು ಜಟಕಾ ಬಂಡಿ" , " ಎಲ್ಕೊಲ್ಲಕೊಂದೂರು" , "ಬಾ ಮಳೆಯೇ ಬಾ"... ಹೀಗೆ ಅನೇಕ ಗೀತೆಗಳನ್ನು ಪ್ರಸಿದ್ದ ಮಾಡಿದವರು ಈ ತಂದೆ-ಮಗನ ಜೋಡಿ.. "ಬ್ರಹ್ಮ ನಿಂಗೆ ಜೋಡಿಸ್ತೀನಿ ಯಂದ ಮುತ್ತಿದ ಕೈನ" ಎಂದು ಹಾಡಿದ ರಾಜು ಅದೇ ಹೆಂಡಕ್ಕೆ ಬಲಿಯಾಗಿದ್ದು ವಿಪರ್ಯಾಸ..

ಯಾವ ಮೋಹನ ಮುರಳಿ ಕರೆಯಿತು ದೂರ ತೀರಕ್ಕೆ ನಿನ್ನನು....
ಯಾವ ಬೃಂದಾವನವು ಸೆಳೆಯಿತು ನಿನ್ನ ಮಣ್ಣಿನ ಕಣ್ಣನು...